Nun mundo que pasa por momentos de crispación que
alcanza a mozos e mozas de toda Europa, derivando en ocasións en manifestacións
violentas, talvez a música -e outras artes- poderían axudar a acougar os ánimos
e canalizar de forma menos estrondosa as súas xustas reivindicacións.
O ensino da música convértese, pois, nun factor fundamental. Para falar diso, xunto cos beneficios no desenvolvemento socioemocional e persoal de quen recibe formación musical, convidamos o programa a Alma Cendán González, vicedirectora do Conservatorio Xan Viaño de Ferrol e profesora de piano, xunto con Marta García Nieto, pedagoga e violonchelista, directora da escola de música Dando a Nota.
Ambas as expertas, e a preguntas de Césio e Vicente, explicaron tamén outros aspectos acerca de cómo está considerada a música no ensino regrado na educación primaria e secundaria en Galicia, a consideración da música clásica respecto a outras músicas e aspectos relativos a outras artes.
Á vez que agradecemos a Alma e Marta a súa asistencia ao Faladoiro, pedímoslles desculpas polas dificultades técnicas con que nos enfrontamos para realizar e reproducir cun mínimo de calidade o programa. Desculpas que, así mesmo, pedimos á audiencia de Radio Filispim.
Nenhum comentário:
Postar um comentário